Person

Haraldur Júlíusson (1885-1973)

• Haraldur Júlíusson

14.02.1885-27.12.1973

Haraldur var fæddur á Barði (Eyrarlandsvegur 25) á Akureyri 14. febrúar 1885. Faðir: (Kristján) Júlíus Kristjánsson, "keyrari", á Barði. Móðir: María Flóventsdóttir, húsmóðir að Barði.
Haraldur ólst upp í foreldrahúsum við kröpp kjör. Hann hóf bakaranám á unga aldri hjá Olgeiri bróður sínum en líkaði ekki og réði sig í vinnu á Hótel Oddeyri og vann þar í nokkur ár. Því næst hóf hann verslunarstörf, fyrst há Karli Schiöth þar sem hann vann í sjö ár. Árið 1912 tók hann sig upp og flutti til Sauðárkróks. Til að byrja með, eða í sjö ár, vann hann hjá Kristni P. Briem við verslun hans en stofnaði sína eigin verslun árið 1919 og rak hana til dauðdags - Verslun H. Júlíussonar.
Haraldur var einn stofnenda Sjúkrasamlags Sauðárkróks sem hóf starfsemi sína 1913. Hann stofnaði, ásamt fleirum, útgerðarfélagið Garðar árið 1921 og gerði út samnefndan mótorbát ásamt því að reka fiskverkun. Hann var einn af forgöngumönnum og eigendum Útgerðarfélags Sauðárkróks sem stofnað var árið 1945. Hann var einn af forgöngumönnum Móvinnslufélagsins sem stofnað var árið 1940 og var ætlað að afla eldsneytis ef skortur yrði í stríðinu. Haraldur var umboðsmaður B.P. frá árinu 1931 og sá um alla dreifingu á vörum þeirra á svæðinu. Hann stofnaði fyrstu bifreiðastöðina á Sauðárkróki, Bifreiðastöð Skagafjarðar ásamt Sigurði Björnssyni og rak hana í á annan áratug. Þeir félagar höfðu sérleyfi á leiðinni Sauðárkrókur/Varmahlíð og einnig Sauðárkrókur/Haganesvík. Haraldur gerði sjálfur út vöruflutningabíl til Reykjavíkur. Þá hafði Haraldur umboð fyrir H/F Hamar í Skagafirði og seldi mikið af búvélum á sjötta og sjöunda áratugnum.
Haraldur tók einnig virkan þátt í félagsmálum. Hann tók þátt í stofnun og/eða starfssemi fjölda félaga, svo sem Heimilisiðnaðarfélagsins, Talsímafélagsins, Taflfélags Sauðárkróks, Lúðrasveitarinnar, Verslunarmannafélags Sauðárkróks, Náttúrulækningafélags Íslands og fleira. Hann átti sæti í hreppsnefnd Sauðárkrókshrepps frá 1922-1934. Kjörinn fyrsti heiðursfélagi Sjálfstæðisfélags Sauðárkróks árið 1970. Kona Haraldar var Guðrún Ingibjörg Bjarnadóttir (1897-1971) en þau giftu sig 21.07.1928.
Saman áttu þau tvö börn, Bjarna Har og Maríu Kristínu.

Bjarni Haraldsson (1930-2022) (14.03.1930-17.01.2022)

María Kristín Haraldsdóttir (1931-2016) (17. apríl 1931 - 18. des. 2016)

Guðrún Ingibjörg Bjarnadóttir (1897-1971) (19.01.1897-08.09.1971)

Kaupmannafélag Sauðárkróks (1966-172)

S00682

Héraðsskjalasafn Skagfirðinga (1947-)**

IS-HSk

Final

Hlutaskráning

06.05.2016 frumskráning í atom, sup.
Lagfært 02.06.2020. R.H.

• íslenska

Skagfirskar æviskrár. Tímabilið 1910-1950 I. Umsjón og ritstjórn: Hjalti Pálsson. Sögufélag Skagfirðinga, Sauðárkróki, 1994 (Skagfirsk fræði). Bls.107-110.