Showing 1 results

Sunnudaginn 30. maí 1908 var haldinn stofnfundur Ungmennafélagsins Hegri að Ási í Hegranesi.
Málshefjandi var Ólafur Sigurðsson á Hellulandi er vakið hafði fyrst máls á stofnun slíks félags nokkru áður við messu á Ríp. Eftir nokkrar umræður var félagið stofnað með tólf meðlimum. Lög voru samin og samþykkt og allir meðlimir skrifuðu undir skuldbindingar félagsins. Í stjórn félagsins var kosið og hlutu þessir kosningu, Magnús Gunnarsson Utanverðunesi, gjaldkeri. Ólafur Sigurðsson Hellulandi, formaður. Stefanía Guðmundsdóttir Ási, skrifari.
Stofnendur félagsins voru þessir: Einar Guðmundsson Ási, Hróbjartur Jónasson Keldudal, Jósteinn Jónasson Vatnsskarði, Magnús Gunnarsson Utanverðunesi, Ólafur Sigurðsson Hellulandi, Páll Magnússon Hellulandi, Sigurlaug Hannesdóttir Ríp, Sigurlaug Guðmundsdóttir Ási, Stefanía Guðmundsdóttir Ási, Skúli Guðjónsson Vatnskoti, Valdimar Guðmundsson Ási, Þórarinn Jóhannsson Ríp.
Á fundinum kom fram athugasemd frá Ólafi Sigurðssyni: Nú var félagið stofnað, allir stofnendur voru sammála um það að hér væri slæmur félagsskapur og stór þörf að bæta úr slíku, að vísu væri ekki svo erfitt að stofna félag en það væri verra að halda þeim saman eða að minnsta kosti vissu allir það að svo hafði það gengið með áður stofnuð félög. Nú vildu allir stofnendur þessa félags halda í orustu, allir fyrir einn og einn fyrir alla móti þessum sundrungar anda og ófélagslyndi sem væri svo mjög ríkjandi í þessari litlu sveit. Með þetta fyrir augum fór hver heim til sín.
Stefnuskrá félagsins var þessi:
a) Að reyna af alefli að vekja áhuga hjá æskulýðnum til að starfa fyrir sjálfa sig, land sitt og þjóð.
b) Að temja sér að beita starfskröftum sínum í félagi og utan félags.
c) Að reyna af fremsta megni að styðja við og viðhalda og efla allt það sem er þjóðlegt og rammíslenskt og horfir til gagns og sóma fyrir hina íslensku þjóð. Sérstaklega skal lögð áhersla á að stunda að fegra og hreinsa móðurmálið.