Ásta Kristmundsdóttir, f. að Selá á Skaga 12.06.1902, d. 15.04.1980 á Sauðárkróki. Foreldar: Kristmundur Guðmundsson síðast bóndi á Selá og kona hans Guðrún Guðmundsdóttir. Ásta var yngst fjögurra systkina. Hún ólst upp hjá foreldrum sínum til 12 ára aldurs, fyrstu sex árin á Selá en síðan að Höfnum á Skaga. Síðan dvaldi hún á Hóli og hjá hjá systur sinni og mági á Hrauni. Sautján ára gömul réðist hún til Þorvaldar Guðmundssonar bónda í Brennigerði og Salóme Pálmadóttur. Þau ráku sjúkrahúsið á Sauðárkróki og vann Ásta þar um skeið. Á Sauðárkróki dvaldi hún um tíma á heimili Jóhanns og Þorbjargar Möller.
Ásta og Vilhjálmur bjuggu í Víkum 1926-1934 og á Hvalnesi 1934-1956. Eftir að Ásta fluttist til Sauðárkróks vann hún lengst af við fiskverkun og ræstingu á pósthúsinu. Hún var mikil hannyrðakona og öll matreiðsla fórst henni vel úr hendi.
Maki: Vilhjálmur Árnason (1898-1974). Þau eignuðust þrjú börn og ólu upp tvö fósturbörn, Karl Thomsen Hólm og Önnu Liljju Leósdóttur.

Hjalti fæddist á Víkum á Skaga A-Hún., sonur hjónanna Árna Antoníusar Guðmundssonar bónda og smiðs í Víkum og Önnu Lilju Tómasdóttur húsfreyju.
Hjalti kvæntist Önnu Lilju Magnúsdóttur og varð þeim níu barna auðið. Hjalti og Anna Lilja bjuggu allan sinn búskap á Skeggjastöðum í Blöndudal. ,,Meðfram búskapnum starfaði Hjalti sem póstur sveitarinnar í áratugi. Á fyrstu árum búskapar síns eignaðist hann jarðvinnsluvélar sem hann nýtti fyrir sjálfan sig og vann auk þess fyrir nágranna sína. Hann var einnig sjálfmenntaður járnsmiður, átti smiðju þar sem hann smíðaði m.a. skeifur undir reiðhesta sína og annarra."

Vilhjálmur Árnason, f. í Víkum á Skaga 30.10.1898, d. 09.09.1974 á Sauðárkróki. Foreldrar: Árni Antoníus Guðmundsson bóndi og smiður í Víkum og kona hans Anna Lilja Tómasdóttir. Vilhjálmur ólst upp í Víkum, þar sem forfeður hans höfðu búið margar kynslóðir. Hann ólst upp við landbúnaðarstörf og útgerð þar. Hann var bóndi í Víkum 1926-1934 fyrst á hálfri jörðinni og síðan allri. Bjó á Hvalnesi 1934-1956 og síðan á Sauðárkróki til æviloka. Þar stundaði hann ýmsa verkamannavinnu, m.a. í fiskvinnslu og á sláturhúsi.
Maki: Ásta Jónína Kristmundsdóttir (1902-1980).Þau eignuðust þrjú börn. Einnug ólu þau upp tvö fósturbörn, Karl Thomsen Hólm og Önnu Lilju Leósdóttur.