Sigurður Sigurðsson, f. í Vigur, Ögurhreppi í Ísafjarðardjúpi 19.09.1887, d. í Hafnarfirði 20.06.1963. Foreldrar: Sigurður Stefánsson prestur og alþingismaður í Vigur og kona hans Þórunn Bjarnadóttir húsfreyja í Vigur. Sigurður ólst upp hjá foreldrum sínum í Vigur. Hann varð stúdent frá MR 1908. Cand. juris frá HÍ 1914. Yfirdómslögmaður á Ísafirði frá 1914-1921, jafnframt gjaldkeri í útibúi Íslandsbanka á Ísafirði og síðar gæslustjóri Landsbanka Íslands þar á meðan hann bjó á Ísafirði. Skipaður fulltrúi í fjármáladeild Stjórnarráðs Íslands 1921 og settur bæjarfógeti í Vestmannaeyjum frá 26. febrúar til 4. ágúst 1924. Skipaður sýslumaður Skagfirðinga 1. desember 1924 og gegndi því embætti til ársloka 1957. Frá 24.05.1947 var Sigurður jafnframt bæjarfógeti á Sauðárkróki. Sigurður gegndi ýmsum trúnaðarstörfum, var m.a. bæjarfulltrúi á Ísafirði 1917-1920. Gekkst fyrir stofnun Búnaðarsambands Skagfirðinga í árslok 1930 og sat í stjórn þess frá upphafi. Gekkst einnig fyrir stofnun Sögufélags Skagfirðinga 6. febrúar 1937 og sat í stjórn þess frá upphafi og var forseti félagsins 1937-1948. Maki: Guðríður Stefanía Arnórsdóttir (jafnan kölluð Stefanía). Þau eignuðust níu börn.

Guðmundur Benediktsson, f. 06.04.1901 á Hrafnabjörgum í Svínadal A-Hún., d. 25.10.1987 á Akranesi. Foreldrar: Benedikt Jóhannes Helgason bóndi á Hrafnabjörgum og Guðrún Ólafsdóttir. Guðmundur missti föður sinn aðeins 6 ára gamall og fluttist tveimur árum síðar með móður sinni að Ási í Vatnsdal til móðurbróður síns, Guðmundar Ólafssonar alþingismanns, og átti þar heima til fullorðinsára. Vann hann þar að búi frænda síns og á sumrin á námsárunum og átti þar heima þar til hann gerðist prestur og fluttist að Barði. Hann hóf nám við MA og lauk þar stúdentsprófi vorið 1928. Lauk embættisprófi frá guðfræðideild HÍ 1933 og var settur sóknarprestur í Barðsprestakalli í Fljótum sama ár og þjónaði þar til 1966. Þar hafði hann einnig búskap og byggði upp húsakost á jörðinni. Tók jafnframt að sér aukaþjónustu í Fellsókn 1951-1952 og í Hofsósprestakalli öllu 1962-1963.
Guðmundur var allmörg ár í hreppsnefnd og oddviti hennar frá 1946-1950. Formaður sjúkrasamlags sveitarinnar 1945-1965. Formaður lestrarfélags Haganeshrepps 1934-1966.
Þegar Guðmundur missti konu sína sviplega tók Signý dóttir þeirra við forstöðu heimilisins en hún var skipuð skólastjóri við barnaskólann á Sólgörðum árið 1959. Þá voru þau feðgin ýmist heima á Barði eða í skólanum á Sólgörðum, sem var heimavistarskóli. Kenndi Guðmundur þá í forföllum Signýjar og þegar með þurfti. Guðmundur fluttist til Guðmundar Ólafs sonar síns sem þá bjó í Reykjavík en síðar fluttist hann með honum á Akranes. Maki: Guðrún Sigrún Jónsdóttir, f. 1905 á Kimbastöðum í Borgarsveit. Þau eignuðust fimm börn og lést eitt þeirra fárra vikna. Ólu auk þess upp Guðfinnu Gunnarsdóttur frá 9 ára aldri.