Foreldrar: Friðbjörn Benediktsson b. á Finnastöðum í Sölvadal og kona hans Sigríður Sveinsdóttir. Ungur að árum missti Jóhannes föður sinn og fór þá í fóstur í Öxnadal. Varð gagnfræðingur frá Möðruvallaskóla árið 1900 og réðst sama ár kennari í Holtshrepp í Fljótum. Jóhannes ávann sér fljótt ást þeirra barna sem hann kenndi og virðingu forreldra þeirra. Jóhannes giftist Kristrúnu Jónsdóttur frá Illugastöðum og bjuggu þau víða í Fljótum; Á Lambanes-Reykjum, Molastöðum, Stóra-Holti, Sléttu, Hólum, Gili og Illugastöðum. Síðast bjuggu þau á Brúnastöðum. Hann gegndi föstum kennarastörfum 1900-1915 og smábarnakennslu 1936-1942. Oddviti Holtshrepps varð hann 1913 og gegndi því ásamt öðrum trúnaðarstörfum til 1922. Jóhannes og Kristrún eignuðust þrjú börn.

Foreldrar: Sigurður Jóakimsson bóndi að Vatnsenda í Þistilfirði og k.h. Kristrún Jónsdóttir frá Syðra-Hóli í Kaupangssveit. Var hjá foreldrum sínum til tíu ára aldurs er hann fluttist að Knappsstöðum í Stíflu til Maríu föðursystur sinnar og sr. Páls Tómassonar. Kvæntist árið 1875 Guðfinnu Gunnlaugsdóttur frá Garði í Ólafsfirði. Þau bjuggu á Knappsstöðum 1880-1885, á Molastöðum 1885-1893, á Illugastöðum í Fljótum 1893-1917 og í Hólum í Fljótum 1917-1920. Jón og Guðfinna eignuðust átta börn og ólu upp tvö vandalaus börn. Einnig áttu aldraðir oft hjá þeim athvarf.