Fonds E00026 - Ungmennafélagið Æskan í Staðarhreppi (1905-)

Málfundafélagið Æskan var stofnað í Staðarhreppi 20. október 1905 og starfaði það þannig þangað til að félaginu var breytt í Ungmennafélagið Æskan á fundi sem haldinn var á Reynistað þann 24. janúar 1909.
Stofnfélagar málfundafélagsins voru 15, aðalforgöngumaður að stofnun þess var Jón Sigurðsson (1888-1972) á Reynistað.
Tilgangur ungmennafélagsins var meðal annars að „reyna að alefli að vekja löngun hjá æskulýðum til að starfa ötullega fyrir sjálft sig, land og þjóð og fyrst og fremst að þeim framfararmálum sem kunna að koma innan sveitarinnar“ eins og kemur fram í lögum félagsins. Einnig voru félagsmenn hvattir til að vinna ötullega að hvers konar íþróttamálum og yfirleitt að efla allt það er að andlegri og líkamlegu atgerfi lítur.
Ungmennafélagið Æskan varð síðar brautryðjandi að stofnun Ungmennasambands Skagafjarðar.