Flugklúbbur Sauðárkróks var stofnaður á sumardeginum fyrsta, þann 20. apríl 1978. Tildrög þess að klúbburinn var stofnaður er að áður hafði verið starfandi Svifflugfélag um nokkurt skeið, það lagðist niður og tók flugklúbburinn við eigum þess en margir stofnendur flugklúbbsins höfðu áður starfað í svifflugfélaginu.
Starfsemi flugklúbbsins var fjölbreytt frá upphafi þess og hefur þar að auki átt stóran þátt í að skapa þann áhuga sem er í Skagafirði fyrir flugi.
Tilgangur félagsins samkvæmt lögum þess er vinna með aukinni þekkingu og áhuga á flugi og flugmálum og stuðla að eflingu flugs og fluglistar innan klúbbsins sem utan hans.
Flugklúbburinn átti ríflegan hlut í Flugfélagi Sauðárkróks hf. sem átti kennsluvél og flugskýli á Sauðárkróksflugvelli. Klúbburinn vann að því ásamt Flugfélagi Sauðárkróks að stofna flugskóla og koma á bóklegu námskeiði fyrir einkaflugmenn auk þess að halda flugdag í nokkur skipti.
Ekki er vitað með vissu hversu lengi flugklúbburinn starfaði.