- S00298
- Person
- 17.4.1923-1.7.2011
Ragnar Hansen múrarameistari fæddist á Sauðárkróki 17. apríl 1923. Foreldrar hans voru hjónin Friðrik Hansen kennari, vegavinnuverkstjóri, oddviti og ljóðskáld frá Sauðá við Sauðárkrók og Jósefína Erlendsdóttir Hansen, saumakona og klæðskeri frá Beinakeldu, Torfulækjarhreppi, A-Hún. Hinn 25. júlí 1953 kvæntist Ragnar Hjördísi Kristófersdóttur. ,,Ragnar byrjaði í vegavinnu með föður sínum aðeins 9 ára að aldri. Hann flutti að heiman 14 ára í kjölfar láts móður sinnar. Vann hann ýmis störf næstu árin. Lauk Héraðsskólanum á
Laugarvatni 1941, iðnskólaprófi í Reykjavík og sveinsprófi í múraraiðn 1945. Meistarabréf fékk hann 1949 og byggingarleyfi í Reykjavík 1950. Félagi í Múrarafélagi Reykjavíkur frá
1946-1981 og síðan í Múrarameistarafélagi Reykjavíkur. Var um tíma gjaldkeri í Múrarafélaginu og fulltrúi í Iðnráði. Kennari í flísalögn á vegum Iðnfræðsluráðs. Ragnar hefur unnið
við flísar og múrverk í 62 ár. Var með sjálfstæðan rekstur og menn í vinnu árum saman og stofnaði síðar fyrirtækið Hansen verktaka ásamt syni sínum. Ragnar var jafnan með stór
verk, meðal annars Borgarleikhúsið, hluta af Kringlunni, DAS í Reykjavík og Hafnarfirði, fjölmarga leikskóla, kirkjur og sundlaugar á höfuðborgarsvæðinu. Einnig lagði hann flísar og
grjót í Ráðhúsi Reykjavíkur, Flugstöð Leifs Eiríkssonar, Smáralind, Landspítala og ýmsum frystihúsum úti á landi. Síðasta opinbera verkið var flísalagning Smáralindarinnar þegar hann var 78 ára að aldri."