Sonur Nikódemusar Jónssonar og Valgerðar Jónsdóttur. Útgerðarmaður á Sauðárkróki. Kvæntist Pálmeyju Haraldsdóttur, þau eignuðust fimm börn.

Foreldrar: Þorsteinn Þorsteinsson og Guðlaug Baldvinsdóttir, Vík í Haganesvík. Sveinn var skipstjóri og hafnarvörður á Siglufirði og síðar hafnarvörður í Vestmannaeyjum.
Maki: Anna Júlíana Guðmundsdóttir frá Syðsta-Mói í Fljótum (1901-1985). Þau eignuðust þrjú börn.

Fæddur í Hafnarfirði. Foreldrar: Ögmundur Sigurðsson og fyrri kona hans Guðrún Sveinsdóttir en hún lést þegar Sveinn var á öðru ári. Giftist Ögmundur þá Guðbjörgu Kristjánsdóttur sem gekk Sveini í móðurstað. Sveinn varð gagnfræðingur aðeins fjórtán ára og stúdent fjórum árum síðar. Lauk guðfræðiprófi frá Háskóla Íslands árið 1920. Kenndi veturinn eftir við gagnfræðaskólann í Flensborg. Vígðist til Kálfholts í Holtum haustið 1921 og bjó þar í áratug en fluttist þá niður í Þykkvabæ. Bjó þar á nokkrum stöðum uns byggt var prestsetrið Kirkjuhvoll 1943. Þar bjó hann til haustsins 1969 er hann fluttist til Reykjavíkur og bjó þar til æviloka. Meðfram preststarfinu sinnti hann kennslu.
Maki 1: Helga Sigfúsdóttir frá Mælifelli. Eignuðust þau 4 börn.
Maki 2: Dagbjört Gísladóttir frá Suður-Nýjabæ í Þykkvabæ. Þau eignuðust 3 dætur.

Sonur Stefáns Guðmundssonar og Sigurlaugar Ólafsdóttur. Þau bjuggu fyrst um sinn að Giljum í Vesturdal en fluttu svo fyrst að Daufá en síðan í Litluhlíð. Þegar Sveinn var sex ára gamall lést faðir hans, vegna mikillar fátæktar var hann tekinn frá móður sinni níu ára gamall og þurfti að vinna fyrir sér á ýmsum bæjum eftir það. Árið 1908 fór hann sem vinnumaður í Tunguháls og kvæntist þar Guðrúnu Soffíu Þorleifsdóttur sem var þá búandi þar. Sveinn varð fljótt umsvifamestur í framförum og framkvæmdum bænda í Lýtingsstaðahreppi, bústofn hans var stór og ætíð fóðraður til mikilla afurða. Sveinn sinnti einnig ábyrgðar- og trúnaðarstörfum í sinni sveit , sat í hreppsnefnd, í stjórn búnaðarfélagsins, var forðagæslumaður og fjallskilastjóri. Árið 1938 fluttu þau hjónin til Akureyrar þar sem Sveinn vann fyrst við landbúnaðarstörf en síðar við skipaafgreiðslu Eimskips. Sveinn var stofnandi Landgræðslusjóðs Hofsafréttar og var slíkt einstakt framtak í þeirri tíð. Einnig stofnaði Sveinn sjóð til minningar um móður sína, Sigurlaugu Ólafsdóttur en tilgangur sjóðsins var ,,að styrkja fátækar, heilsulitlar eða barnamargar ekkjur í hreppnum". Sveinn og Guðrún eignuðust ekki börn en áttu einn fósturson.

Sonur Braga Sigurðarsonar vélsmiðs á Sauðárkróki og k.h. Sigurlaugar Sveinsdóttur.

Var húsmaður og lausamaður í Sléttuhlíð og á Höfðaströnd, Skag. Var í Mosfelli í Fagranessókn, Skag. 1860. Leigjandi á Keldum í Fellssókn, Skag. 1910. Ókvæntur. Oft nefndur sem síðasti förumaðurinn í Skagafirði.

Sonur Lilju Sigurðardóttur og Sveins Gíslasonar.

Alinn upp hjá Birni Gunnarssyni og Þóru Jónsdóttur á Kljáströnd við Grenivík. Verkamaður á Neskaupstað 1930. Síðar sjómaður og bankaritari á Akureyri.

Frá Stóru-Gröf á Langholti. Starfaði sem múrari.

Sveinn Vilhjálmur Pálsson, f. á Gili í Fljótum 15.08.1903, d. 28.07.1992. Foreldrar: Páll Arngrímsson bóndi í Hvammi í Fljótum og kona hans Ingveldur Hallgrímsdóttir. Sveinn ólst upp hjá foreldrum sínum, lengst af í Hólakoti en síðar í Hvammi. Þegar hann fékk aldur til fór hann til sjós og réri bæði fyrir fisk og hákarl úr Hraunakróki. Átti hann heimili í Hvammi þar til hann stofnaði heimili að Illugastöðum með sambýliskonu sinni. Hann var bóndi á Illugastöðum 1936-1939, á Sléttu 1940-1942 og aftur 1943-1971. Árið 1942-1943 voru þau Kristín í húsmennsku á Bjarnargili. Þá brugðu þau búi og fluttu til Reykjavíkur. Þau bjuggu fyrst í Hraunbænum en síðar á Bræðraborgarstíg. Síðustu árin voru þau á Dvalarheimili á Dalbraut í Kópavogi.

,,Sveinsína ólst upp hjá foreldrum sínum, Bergi Sveinssyni og Jóhönnu Sveinsdóttur, fyrst á Þorbrandsstöðum í Langadal, en fluttist síðan að Mánaskál á Laxárdal, er hún var þrettán ára gömul. Um tvítugsaldur brá hún sér til Reykjavíkur og sótti sauma- og hannyrðanámskeið hjá systrunum á Landakoti og vann þar jafnframt. Að því loknu fluttist hún heim í átthagana og dvaldis á Mánaskál allt þar til hún fluttist til Ingimundar Bjarnasonar járnsmiðs að Kirkjuskarði. Sveinsína var merkiskona á marga lund; mikil húsmóðir og sinnti félagsmálum af atorku og áhuga. Hún var formaður verkakvennafélagsins Öldunnar 1940-1941, starfaði lengi með kvenfélaginu og var um árabil ein af virkustu félögum leikfélagsins. Ásamt annasömum húsmóðurstörfum, vann hún um langt árabil þá vinnu sem til féll, bæði sláturhúss- og fiskvinnu. Hún var greind, glaðvær, góður félagi sem hvarvetna bar með sér hressandi blæ. Hún var ágætlega hagmælt og alltítt, að snjallar stökur hennar um menn og atvik á vinnustöðum flygju milli starfsfólksins og vektu kátínu. Sveinsína var meðalhá vexti og allþrekin, dökkhærð og brúneyg. Tengsl hennar við sveitina voru sterk. Hún hafði mikið yndi af að umgangast dýr og sinnti af alýð þeim blómum, sem uxu í garði hennar. Gestrisni hennar og greiðasemi var rómuð og gerði hú sér ekki mannamun með hreinlyndi og heillyndi fremur en bóndi hennar. Hún var virt kona, vinmörg og höfðingleg." Ingimundur og Sveinsína eignuðust fjórar dætur.

Sverrir Björnsson, húsasmíðameistari, fæddist á Halldórsstöðum á Langholti í Skagafirði 31. desember 1935. Foreldrar hans voru Björn Gíslason, bóndi og smiður í Reykjahlíð í Varmahlíð og Hallfríður Þorsteinsdóttir. Eiginkona Sverris er Guðný Eyjólfsdóttir (1937-) frá Reykjavík, þau eignuðust fimm börn. ,,Sverrir ólst upp í Skagafirði, á Halldórsstöðum, í Geitagerði og Stóru-Seylu þar til foreldrar hans byggðu Reykjahlíð 1948 á landskika úr Reykjarhóli. Skólaganga Sverris hófst í farskóla í Húsey. Hann fór í Gagnfræðaskólann á Sauðárkróki og lærði síðan trésmíðar í Iðnskólanum á Sauðárkróki. Þaðan lá leiðin til Reykjavíkur í starfsnám þar sem hann lauk sveinsprófi í trésmíði. Í Reykjavík kynntist hann konu sinni. Sverrir og Guðný bjuggu sín fyrstu búskaparár í Reykjavík, en fluttu til Sauðárkróks 1961 og hafa búið þar síðan. Sverrir vann við trésmíðar alla tíð þar til hann lét af störfum vegna aldurs. Fljótlega fór hann að vinna sjálfstætt með mági sínum en saman ráku þeir trésmíðaverkstæði. Um 1970 hóf hann störf hjá Trésmiðjunni Borg, gerðist litlu síðar hluthafi í fyrirtækinu og vann þar sem húsasmíðameistari til starfsloka. Sverrir var meðlimur í ýmsum kórum í gegnum tíðina, m.a. Karlakór Sauðárkróks, Kirkjukór Sauðárkróks og síðustu árin Kór eldri borgara. Hann var einnig meðlimur í Lionsklúbbi Sauðárkróks í áratugi."

Sverrir Sigurðsson Svavarsson fæddist 24. nóvember 1934 á Sauðárkróki. Foreldrar hans voru hjónin Svavar Sigpétur Guðmundsson og Sigurbjörg Ögmundsdóttir. ,,Sverrir ólst upp á Sauðárkróki og sem unglingur vann hann nokkur sumur í Varmahlíð, hjá Lindemann, sem rak þar hótel og bensínsölu. 18 ára að aldri fór hann að vinna á Keflavíkurflugvelli og síðan hjá Ísbirninum í Reykjavík og fleiri fyrirtækjum þar. Árið 1956 flutti hann aftur til Sauðárkróks og starfaði hjá Kaupfélagi Skagfirðinga, m.a. í gömlu Gránu, Mjólkursamlagi KS og fleiri deildum Kaupfélagsins um árabil. Hann starfaði sem póstafgreiðslumaður hjá Pósti og síma allmörg ár áður en hann gerðist kirkjuvörður og útfararstjóri við Sauðárkrókskirkju. Eftir að hann hætti störfum vegna aldurs hafði hann ásamt Sigrúnu eiginkonu sinni umsjón með föndri eldri borgara í Safnaðarheimili Sauðárkrókskirkju. Hann var einn af stofnfélögum Kiwanisklúbbsins Drangeyjar á Sauðárkróki og var virkur félagi til dauðadags. Hann var góður söngmaður og starfaði með Karlakór Sauðárkróks í mörg ár og einnig Kirkjukór Glaumbæjarsóknar. Hann var til margra ára félagi í Leikfélagi Sauðárkróks og Hestamannafélaginu Léttfeta á Sauðárkróki."
Sverrir var tvíkvæntur. Hinn 5. júní 1955 kvæntist hann Sigurlín Ester Magnúsdóttur, þau skildu, eignuðust þau þrjá syni. Hinn 17. júní 1967 kvæntist Sverrir Sigrúnu Gíslu Halldórsdóttur frá Halldórsstöðum í Skagafirði, þau eignuðust þau tvö börn.

Sonur Sverris Björnssonar húsasmíðameistara á Sauðárkróki og k.h. Guðnýjar Eyjólfsdóttur.

Húsasmíðameistari eigandi rammaverkstæðis á Sauðárkróki.

Theodóra Guðmundsdóttir, síðar Thoroddsen, f. á Kvennabrekku í Dölum. Árið 1884 giftist hún Skúla Thoroddsen, sýslumanni og alþingismanni. Þau bjuggu fyrst á Ísafirði en síðan í nokkur ár á Bessastöðum á Álftanesi, þar til þau fluttust til Reykjavíkur árið 1908, en þar átti Theodóra heima upp frá því. Þau Theodóra og Skúli eignuðust þrettán börn. Af þeim náðu tólf fullorðins aldri. Skúli lést árið 1916 og nokkrum árum síðar tveir synir þeirra með stuttu millibili. Theodóra Thoroddsen var virk í bókmennta- og menningarlífi Reykjavíkur og hafði mikinn áhuga á þjóðmálum, einkum þeim sem lutu að kvenréttindum. Hún var í Lestrarfélagi kvenna Reykjavíkur og las upp ljóð og frásagnir eftir sig á fundum. Fyrstu verk hennar birtust í Mánaðarritinu, sem var handritað og gekk á milli félagskvenna. Hún samdi merka vísnaþætti um hlut kvenna í íslenskum bókmenntum og birtist sá fyrsti í Skírni árið 1913. Þar fjallaði hún m.a. um aðstöðu kvenna til ritstarfa. Sjálf fór Theodóra ekki að sinna ritstörfum að marki fyrr en um miðjan aldur. Hún var vel menntuð á sviði þjóðfræða, skrásetti þjóðsögur og safnaði lausavísum, samdi ritgerð um íslenska þjóðtrú og þýddi á íslensku norskar og færeyskar þjóðsögur. Hún skrifaði smásögur og sagnaþætti, orti kvæði og stökur, en þekktust er hún fyrir þulur sínar. Þær fyrstu birtust í Skírni árið 1914 ásamt formála eftir Theodóru um þulur sem skáldskapartegund. Þulur komu út árið 1916 og í annarri útgáfu með viðbótum árið 1938. Sú útgáfa hefur verið endurprentuð nokkrum sinnum. Ritsafn Theodóru kom út árið 1960 í útgáfu Sigurðar Nordals.

Theodore fæddist í Seattle í USA 1926, hann átti íslenska móður og danskan föður. Hann missti móður sína á unga aldri. Var við nám í The University of Washington, Seattle árin 1949, 1950 og 1952 og er með eftirfarandi gráður þaðan, B.S., M.S. og Ph. D. (efnaverkfræðingur). Theodore tók miklu ástfóstri við Ísland og gaf Íslendingum vísindabókasafn, einnig færði hann Landsbókasafni Íslands veglega bókagjöf úr einkasafni sínu.

,,Fornleifafræðingur og var þjóðminjavörður 1968-2000. Þór lauk stúdentsprófi frá MR 1958 og fil.kand.-prófi í fornleifa- og þjóðháttafræði frá Uppsalaháskóla 1963. Hann gerðist síðan safnvörður við Þjóðminjasafn Íslands árið 1964 og gegndi því starfi til 1968 en tók þá við embætti þjóðminjavarðar. Því embætti gegndi hann þar til hann lét af störfum árið 2000. Þór gegndi einnig fjölda trúnaðarstarfa, var meðal annars formaður húsafriðunarnefndar um 20 ára skeið, var í stjórn Hins íslenska fornleifafélags frá 1967 og formaður þess frá 1993, í stjórn Stofnunar Árna Magnússonar um skeið og formaður Íslandsdeildar Sambannds norrænna safnmanna 1968-2000."

Foreldrar: Thor Jensen og Margrét Þ. Kristjánsdóttir. Stúdent 1922 og lauk lögfræðiprófi við Háskóla Íslands 1926. Stundaði framhaldsnám í hagfræði í Cambridge og París og einnig um skeið á Spáni og í Portúgal. Framkvæmdastjóri hjá Kveldúlfi hf., forstjóri Sölusambands Íslenskra fiskframleiðenda. Skipaður aðalræðismaður Íslands í Bandaríkjunum 1941 og ambassador þar 1955. Einnig sendiherra Íslands í mörgum öðrum ríkjum vestan hafs. Var alþingsmaður Snæfellinga 1933-1941. Maki: Ágústa Ingólfsdóttir. Þau eignuðust þrjú börn.

Þór starfar sem Sviðs- og Minjavörður Suðurnesja. Hann er fornleifafræðingur að mennt.

Þóra Björg Guðmundsdóttir, f. 29.12.1940.
Foreldrar: Elín Jóhannesdóttir og Guðmundur Marinó Ingjaldsson (1912-1979).
Móðursystir: Hólmfríður Jóhannesdóttir sem bjó á Sauðárkróki.

Þóra Elfa er framhaldsskólakennari að mennt. Setjari. Búsett í Kópavogi.

Fædd og uppalin í Reykjavík. Kvæntist Sigurði Pálssyni héraðslækni á Sauðárkróki. Fluttist til Reykjavíkur eftir andlát hans 1910 og bjó þar síðan. Þóra og Sigurður eignuðust tvö börn.

Þóra Helgadóttir fæddist í Merkigarði 11. apríl 1924. Hún ólst upp hjá foreldrum sínum. Þóra var 14 ára þegar móðir hennar dó, hún tók þá fljótlega við heimilishaldi í Merkigarði og sá um heimilið fyrst fyrir föður sinn og síðan fyrir Arnljót bróður sinn. Þóra fór í Húsmæðraskólann á Blönduósi um tvítugt og var þar í einn vetur. Þóra eignaðist einn son, Sigurð Helga Þorsteinsson, rafvirkjameistara í Skagafirði. Árið 1991 flutti Þóra á Sauðárkrók og hélt heimili fyrir Sigurð son sinn þar til hann andaðist.

Var í Ölvaðsholti, Hraungerðissókn, Árn. 1845, flutti þangað með foreldrum frá Efra-Geldingaholti 1844. Fór 1847 frá Ölvaðsholti að Hæli í Gnúpverjahreppi. Húsfreyja í Ártúni, Gufunessókn 1859. Vinnukona í Breiðholti, Reykjavíkursókn, Gull. 1860. Vinnukona í Útkoti í Garðasókn sumarið 1862. Vinnukona Guðmundar Guðmundssonar á Hóli í Garðasókn, Gull frá um 1863-68 og eignaðist með honum a.m.k. 4 börn. Vinnukona á Lambastöðum, Reykjavíkur/Seltjarnarnessókn 1870. Vinnukona á Lambastöðum, Reykjavík 1880. Fluttist til Skagafjarðar með dætrum sínum Margréti Þormóðsdóttur og Jónu Guðmundsdóttur 1881. Var á Mælifellsá, Mælifellssókn, Skag. 1890. Tökukona í Ríp, Rípursókn, Skag. 1901. Var í Bjarnarhöfn, Bjarnarhafnarsókn, Snæf. 1910. Var í Ágústshúsi, Stykkishólmi, Snæf. 1920. Fylgdi Jóni Ólafi Guðsteini Eyjólfssyni, barnabarni sínu, yfir á Snæfellsnesið.

Foreldrar: Jón Jónatansson b. á Höfða á Höfðaströnd og k.h. Rannveig Sigríður Espólín Hákonardóttir. Fór úr Skagafirði austur í Mjóafjörð með móður sinni árið 1883. Kvæntist Birni Gunnarssyni frá Höfða við Eyjafjörð, þau fluttust síðar til Norðfjarðar.

Dóttir Jóns Sigurðssonar b. og smiðs í Stóragerði í Óslandshlíð og k.h. Níelsínu Soffíu Kristjánsdóttur. Kvæntist Friðriki V. Guðmundssyni b. á Höfða á Höfðaströnd, Þóra lést þar af barnsförum.

Um kirkjur

Þóra fæddist á Sauðárkróki 18. júlí 1913.
Húsfreyja í Reykjavík og síðast búsett þar.
Maður hennar var Pétur Gunnarsson (1911-1973).

Foreldrar: Stefán Rósantsson og Helga Guðmundsdóttir á Gilhaga. Rósa ólst upp í stórum systkinahóp á Gilhaga. Ung gegndi hún húsmóðurhlutverkinu á bænum í veikindum móður sinnar. Rósa átti heimili að Gilhaga uns hún fluttist að Reykjum. Rósa gekk tvo vetur í skóla á Löngumýri, 1957-1959, og kenndi síðar vélprjón við skólann. Hún vann m.a. í mötuneyti Steinsstaðaskóla. Þá var hún lengi húsvörður í Félagsheimilinu Miðgarði. Hún var listfeng og handlaginn og saumaði m.a. altarisdúk í Reykjakirkju. Hún söng í kirkjukór Reykjakirkju og tók virkan þátt í hvers konar menningar- og líknarmálum, m.a. starfi Kvenfélags Lýtingsstaðahrepps. Maki: Indriði Jóhannesson. Þau eignuðust ekki börn.

Foreldrar hennar voru Sigurður Jónsson, skáld og bóndi á Arnarvatni og k.h. Sólveig Hólmfríður Pétursdóttir. Þóra giftist Jóni Kristjánssyni, bónda og starfsmanni Kísiliðjunnar hf. ,,Þóra var húsfreyja á stóru heimili á Arnarvatni í hálfa öld þar sem hún gekk í öll störf, innan heimilis sem utan. Þóra söng í kirkjukór Skútustaðakirkju frá 1946 og sá um bréfhirðingu á Arnarvatni í aldarþriðjung."

Þóra fæddist á Gili í Borgarsveit. Faðir: Þorsteinn Pétursson bóndi á Gili, Mið-Grund og síðast í Grundargerði. Móðir/eiginkona Þorsteins: Ingiríður Eiríksdóttir.
Þóra ólst upp hjá foreldrum sínum og vann, með hléum, í búi þeirra í Grundargerði þar til faðir hennar lést árið 1838. Var vinnukona hjá móður sinni á sama stað 1836-37 og hjá Eiríki bróður sínum á sama stað. Bjó hún sjáf í Grundargerði 1842-54 og gerðist svo vinnukona á sama stað frá 1854 til æviloka.
Þóra hafði lítið bú en virðist hafa komist þokkalega af. Hún var ógift en eignaðist tvö börn.
Barnsfaðir 1: Páll Sigfússon bóndi á Miklahóli í Viðvíkursveit og Litlabæ í Blönduhlíð (f. 1800): Lilja (f. 1830). Sögusagnir voru samt til um að Ari Arason á Flugumýri væri réttur faðir barnsins.
Barnsfaðir 2: Þorleifur Einarsson (1788-?): Stefán (f. 1839).

Þóranna Pálmadóttir, f. 18.03.1889, d. 11.03.1951 í Reykjavík. Foreldrar: Pálmi Þóroddsson og Anna Jónsdóttir.
Maki: Pétur Pétursson, f. 07.09.1872, bókhaldari á Sauðárkróki. Þau eignuðust fimm börn og náðu fjögur þeirra fullorðinsaldri. Þau bjuggu á Sauðárkróki til 1914 en þá fluttust þau til Akureyrar þar sem Pétur rak eigin verslun og útgerð.

,,Þórarinn Guðmundsson var fiðluleikari og tónskáld. Þórarinn var fyrsti Íslendingurinn til að ljúka prófi í fiðluleik við erlendan skóla, en árið 1913 lauk hann prófi frá Tónlistarháskólanum í Kaupmannahöfn og stundaði síðar framhaldsnám í Þýskalandi. Þórarinn kenndi fiðluleik um langt skeið en hann var fyrsti formaður og stjórnandi Hljómsveitar Reykjavíkur 1921. Árið 1930 varð hann starfsmaður Ríkisútvarpsins og var lengi stjórnandi hljómsveitar þess. Hann stofnaði Félag Íslenskra tónlistarmanna árið 1939 og var formaður þess fyrstu árin. Síðustu starfsár sín lék Þórarinn með Sinfóníuhljómsveit Íslands eða þar til hann náði eftirlaunaaldri."

Foreldrar: Jóhann Eyjólfsson og Ingibjörg Guðjónsdóttir. Fæddur á Skíðastöðum Laxárdal ytri, sex vikna komið í fóstur til Markúsar Arasonar og Ragnheiðar Eggertsdóttur sem bjuggu þá á Herjólfsstöðum, svo í Holtsmúla á Langholti, að Eyhildarholti í Hegranesi og að lokum á Ríp í Hegranesi. Saman áttu þau ekki börn en ólu Þórarinn upp og voru hjá honum til æviloka. Þórarinn kvæntist árið 1918 Ólöfu Guðmundsdóttur frá Ási í Hegranesi og það sama ár hófu þau búskap á Ríp og bjuggu þar óslitið til 1980 eða í 62 ár samfleytt, þau eignuðust tíu börn.

Þórarinn Jónasson, f. 08.03.1910 í Hróarsdal. Foreldrar: Jónas Jónsson bóndi og smáskammtalæknir og þriðja kona hans Lilja Jónsdóttir. Þórarinn ólst upp hjá foreldrum sínum og systkinum í Hróarsdal. Árið 1936 tók hann formlega við búi þar ásamt bræðrum sínum Páli og Sigurði en þeir höfðu lengi ásamt Leó eldri bróður þeirra, sinnt öllum búrekstri í nafni foreldra sinna. Á þessum árum sótti Þórarinn talsvert vinnu út frá heimili sínu, allt þar til hann gifti sig árið 1949. Vann hann m.a. við símalagnir hjá Þórði Sighvats, húsbyggingar hjá Ólafi Eiríkssyni mági sínum og bræðrum sínum Sigurði og Páli. Komu þeir m.a. að byggingu Steinstaðaskóla. Eftir það fór hann víða og setti upp útvarp á bæjum og síðar vindrafstöðvar.
Þórarinn gegndi fjölda trúnaðarstarfa fyrir sveit sína. Sat ég hreppsnefnd 1954-1966 og 1974-1978. Var bæði varamaður og aðalmaður í sýslunefnd um tíma, hreppstjóri 1955-1956, sat í skattanefnd, skólanefnd og stjórn Búnaðarfélags Rípurherepps ásamt fleiru. Maki: Anna Sigurjónsdóttir frá Nautabúi í Hjaltadal. Þau eignuðust tvær dætur og dó Anna frá þeim ungum. Eftir það tók Sigurbjörg Gunnarsdóttir við heimilishaldi innanbæjar þar til hún lést 1964.

Fæddist að Hóli í Sæmundarhlíð. Heimildum ber ekki saman um fæðingarár. Skagfirskar æviskrár segja að hann hafi fæðst 20. nóvember 1962 en í Íslendingabók er hann talinn hafa fæðst árið 1863. Þórarinn var búfræðingur frá Hólum. Kvæntur Sigríði Þorleifsdóttur (1864-1949). Þau fluttu vestur til Winnipeg í Manitoba árið 1887. Þórarinn fór niður um ís á Winnipegvatni og drukknaði í desember 1890.

Fæddur í Geitagerði í Skagafirði 6. febrúar 1870, dáinn 5. september 1944. Foreldrar: Jón Þórarinsson bóndi þar og kona hans Margrét Jóhannsdóttir húsmóðir. Faðir Hermanns Þórarinssonar varaþingmanns. Lauk Búfræðiprófi frá Hólum 1890. Kennari við Hólaskóla 1893–1896. Bústjóri á Hjaltabakka 1896–1899, síðan bóndi þar til æviloka. Sáttamaður í héraði yfir 30 ár, formaður sáttanefndar frá 1937. Hreppstjóri frá 1906 til æviloka. Oddviti Torfalækjarhrepps frá því um aldamót til 1920. Í fræðslunefnd 1908–1930, lengst af formaður. Í stjórn Kvennaskólans á Blönduósi rúm 30 ár, formaður skólastjórnar frá 1920 til æviloka. Yfirskoðunarmaður landsreikninganna 1926. Skipaður 1927 í yfirfasteignamatsnefnd. Kosinn 1927 í milliþinganefnd í landbúnaðarmálum. Konungkjörinn alþingismaður 1905–1908, alþingismaður Húnvetninga 1911–1913 og 1916–1923, alþingismaður Vestur-Húnvetninga 1923–1927 (Heimastjórnarflokkurinn, Sambandsflokkurinn, Bændaflokkurinn eldri, Heimastjórnarflokkurinn, Utanflokkabandalagið, Sparnaðarbandalagið, Borgaraflokkurinn eldri, Íhaldsflokkurinn). Sagði af sér þingmennsku 1908. Varaforseti sameinaðs þings 1924–1926.

Símritari í Reykjavík.

Þórarinn Magnússon er fæddur 13. október 1819 í Presthvammi þar sem foreldrar hans þá bjuggu. Faðir: Magnús Ásmundsson (1787-1843) bóndi og hreppstjóri á Halldórsstöðum í Laxárdal, Suður-Þingeyjarsýslu og víðar. Móðir: Sigríður Þórarinsdóttir (1794-1862), húsfreyja á Halldórsstöðum og víðar.
Þórarinn ólst upp hjá foreldrum sínum til tvítugs en þá fer hann frá Halldórsstöðum og að Grenjaðarstað þar sem hann var „meðalasveinn“ séra Jóns Jónssonar sem fékkst við lækningar. Þórarinn dvaldi í fjögur ár á Grenjaðarstað og lagði þar stund á nám í skrift, reikningi, dönsku og fleira. Guðrún Jónsdóttir (1821-1886) frá Hóli í Sæmundarhlíð (systir Jóns Jónssonar hreppstjóra á Hóli) dvaldi á sama tíma á Grenjaðarstað en hún var frænka séra Jóns. Svo fór að Guðrún og Þórarinn giftust 6. Júní 1842. Svaramenn þeirra voru Magnús Ásmundsson, faðir Þórarins og Þorleifur Bjarnason bóndi í Vík í Sæmundarhlíð, stjúpi Guðrúnar.
Árið 1843 fluttu Guðrún og Þórarinn að Bessastöðum í Sæmundarhlíð en hún hefur líklega erft jörðina eftir Jón Oddsson afa sinn. Þar bjuggu þau til ársins 1849 er þau fluttu að Halldórsstöðum í Laxárdal. Þegar þau bjuggu á Bessastöðum var Sigríður systir Þórarins send þangað til dvalar en hún hafði eignast barn í lausaleik. Svo fór að Sigríður og Jón Jónsson, albróðir Guðrúnar, giftust. Önnur systir Þórarins, Hólmfríður Magnúsdóttir, giftist svo Bjarna Þorleifssyni í Vík í Sæmundarhlíð en hann var hálfbróðir (sammæðra) Guðrúnar konu Þórarins. Tengsl og samneyti milli þessara tveggja ætta var því mikill.
Þórarinn og Guðrún eignuðust 7 börn sem komust á legg.
Þórarinn dó á Halldórsstöðum þann 18. Júní 1878.

Þórarinn Magnússon, f. 15.08.1913 að Hrútsholti í Eyjahreppi. Maki: Herta Haag frá Svíþjóð. Sem ungur maður fór hann í Bændaskólann á Hvanneyri. Þaðan fór hann í lýðsháskóla í Edslöv og síðan í Svalö, landbúnaðarháskóla í Svíþjóð. Var hann 7 ár í Svíþjóð og stundaði þar störf á sviði landbúnaðar. Kom til Vestamannaeyja árið 1946 og fór svo víða um land, m.a. í Stykkishólm. Stundaði trúboð til æviloka, en hann varð bráðkvaddur á Grænlandi eftir fjögurra ára veru við trúboðsstörf þar.

Þórarinn Sigurjónsson, f. á Hafsteinsstöðum í Staðarhreppi 10.05.1891, d. 03.12.1971 á Blönduósi. Foreldrar: Sigurjón Jónsson bóndi á Bessastöðum í Sæmundarhlíð og kona hans Björg Runólfsdóttir. Þórarinn ólst upp hjá foreldrum sínum og nau þar venjulegrar barnafræðslu. Hann fór til náms við Bændaskólann á Hólum haustið 1907 en varð að hætta námi sama vetur vegna veikinda. Hann hóf búskap á Sæunnarstöðum í Hallárdal á Skagaströnd og bjó þar 1912-1914, á Geirmundarstöðum í Sæmundarhlíð 1914-1915, á Auðnum í sömu sveit 1915-1920, í Vík í Staðarhreppi 1920-1922, í Glæsibæ í Staðarhreppi 1932-1937, í Garði 1937-1945. Fluttist þá að Grund á Blönduósi, þar sem hann hafði nokkrar kindur og hross. Hann fór til Reykjavíkur um 1922 en flutti aftur norður 1932. Í Reykjavík vann hann meðal annars við miðstöðvarlagnir.
Maki 1: Hallfríður Sigríður Jónsdóttir (20.05.1893-24.10.1965) frá Auðnum í Sæmundarhlíð. Talið er að þau hjón hafa skilið um 1923, en þór er fjöldkyldan öll talin til heimilis hjá foreldrum Þórarins til 1923. Þó er vitað að Hallfríður hóf störf á sjúkrahúsinu á Sauðárkróki 1923. Hún bjó á spítalanum og varð síðar hjúkrunarkona þar. Þórarinn og Hallfríður eignuðust fimm börn og Hallfríður eignaðist einn son utan hjónabands.
Maki 2: Sigurlaug Lárusdóttir (18.11.1897-11.08.1973). Þau eignuðust ekki börn saman.

Þorbergur Jónsson fæddist 31. mars árið 1960 að Hóli í Sæmundarhlíð. Foreldrar: Jón Jónsson bóndi og hreppstjóri að Hóli (1820-1904) og Sigríður Magnúsdóttir húsfreyja að Hóli (1828-1912). Þorbergur kvæntist Helgu Bjarnadóttur/Guðbjörgu Bjarnadóttur (1858-1912) árið 1886 en heimildum ber ekki saman um heiti konunnar. Var bóndi í Vík í Staðarhreppi en flutti til Vesturheims árið 1887, nánar tiltekið Nýja Íslands. "Flutti í Argylebyggð 1892 og á land sitt í Hólabyggð ári seinna. Hann bjó félagsbúi með bróður sínum Magnúsi í nokkur ár en flutti svo seinna suður í byggðina þar sem hann keypti lönd suðvestur af Glenboro".
Þorbergur og Guðbjörg ólu upp Sigríði Jakobsdóttur.
Þorbergur dó 2. janúar árið 1920 í Manitoba.

Foreldrar hans voru Elín Aðalbjörg Jóhannesdóttir frá Sauðárkróki og Jósef Stefánsson. Húsasmiður og söngvari. Kvæntur Svövu Einarsdóttur Höjgaard.

Fæddur í Kambakoti á Skagaströnd. Faðir: Þorbergur Arason bóndi og spónasmiður á Vakursstöðum í Hallárdal. Móðir: Steinunn Jónsdóttir húsfreyja á Vakursstöðum.
Þorbergur ólst upp hjá foreldrum sínum og fermdist frá þeim með góðum vitnisburði árið 1815. Vann á búinu til 1826 en þá hóf hann sjálfur búskap á Sæunnarstöðum og bjó þar 1826 til 1851, síðan á Víðivöllum 1851 til 1852 og aftur á Sæunnarstöðum frá 1852 til æviloka. Þorbergur var söðlasmiður og þótti góður bóndi. Þorbergur gegndi hreppstjórastörfum í Vindhælishreppi um nokkurra ára skeið og var einn af stofnmeðlimum "Vinafélags" í Vindhælishreppi, framfarafélags sem var formlega stofnað 5. maí 1848. Árið 1850 hafði Þorbergur makaskipti á jörðum við Magnús Gíslason á Víðivöllum í Blönduhlíð. Þorbergur rak stórbú á Víðivöllum.
Eiginkona 1 (giftust 1825): Kristbjörg Pálsdóttir (1795-1828). Saman áttu þau 4 börn.
Eiginkona 2 (giftust 1831): Kristín Gísladóttir (1809-eftir 1874). Saman áttu þau 16 börn.
Að auki átti Þorbergur börn með Valgerði Pálsdóttur, Þórdísi Ebenesersdóttur og Ástu Hjálmarsdóttur. Sögusagnir voru um fleiri laungetin börn.

Dóttir Jóns Þ. Björnssonar skólastjóra á Sauðárkróki og Geirlaugar Jóhannesdóttur. Ólst upp á Sauðárkróki. Nam við Hjúkrunarkvennaskóla Íslands og stundaði síðan framhaldsnám í barnahjúkrun og öðru tengdu hjúkrun og kennslu í Chicago 1946-47, í St. Louis 1947-48 og einnig í New York. Lauk síðan hjúkrunarkennaranámi í London 1953. Hjúkrunarkona á röntgendeild og lyflækningadeild Landspítalans 1945-46, deildarhjúkrunarkona við sjúkrahúsið á Akureyri hluta árs 1945. Kennari við Hjúkrunarskóla Íslands 1948-1953 og skólastjóri Hjúkrunarskóla Íslands 1954-1983, þar af í starfsleyfi 1977-78. Vann mikið að félagsmálum hjúkrunarfræðinga og sat í nefndum sem mótuðu nám hjúkrunarfræðinga á Íslandi. Síðast bús. í Reykjavík.

Foreldrar: Þorbjörg Pálmadóttir Möller og Jóhann Georg Möller, kaupmaður á Hvammstanga, síðar verslunarstjóri á Sauðárkróki. Eiginmaður Þorbjargar var Jón Leifs tónskáld, þau eignuðust einn son. ,,Fyrstu árin ólst Þorbjörg upp á Sauðárkróki en fluttist til afa síns og ömmu eftir andlát föður síns 1926. Þau voru Pálmi Þóroddsson prestur á Hofsósi og Anna Hólmfríður Jónsdóttir húsfreyja. Á unglingsárum fluttist Þorbjörg til Reykjavíkur og stundaði nám í Verslunarskólanum. Síðar vann hún við skrifstofustörf hjá Slippfélaginu. Þorbjörg fluttist til Kaupmannahafnar þar sem hún hélt heimili fyrir Jakob Möller frænda sinn, sendiherra Íslands í Kaupmannahöfn, ásamt því að stunda skrifstofustörf í sendiráðinu um árabil. Eftir að hún fluttist til Íslands 1951 vann hún á skrifstofu Þjóðleikhússins þar til hún giftist Jóni Leifs. Þorbjörg og Jón hófu búskap að Freyjugötu 3 árið 1956. Á heimili þeirra var skrifstofa Stefs til húsa þar til 1969 er skrifstofan var flutt að Laufásvegi 40. Þorbjörg starfaði þar sem úthlutunarstjóri til ársins 1984. Einnig sat hún í stjórn Stefs um áratugaskeið."

Þorbjörg Pálmadóttir Möller, húsfreyja á Sauðárkróki. Fæddist í Glaumbæ í Seyluhreppi 24. júní 1884. Faðir: séra Pálmi Þóroddsson (1862-1955). Móðir: Anna Hólmfríður Jónsdóttir (1855-1946). Giftist 1906 Jóhanni Georgi Jóhannssyni Möller kaupmanni og verslunarstjóra (1883 - 1926). Þorbjörg lést 29. maí 1944.

Foreldrar: Stefán Stefánsson b. á Heiði í Gönguskörðum og k.h. Guðrún Sigurðardóttir. Kvæntist Birni Jónssyni frá Háagerði við Skagaströnd árið 1877 og það sama ár hófu þau búskap þar. Vorið 1884 fluttu þau að Heiði í Gönguskörðum og 1888 að Veðramóti þar sem Þorbjörg lést árið 1903. Þorbjörg og Björn eignuðust tólf börn, tíu þeirra náðu fullorðinsaldri.

Þorbjörg Þorbjarnardóttir fæddist að Geitaskarði í Langadal 10. september 1928. Foreldrar Þorbjargar voru hjónin Þorbjörn Björnsson, bóndi á Heiði í Gönguskörðum og síðar Geitaskarði og eiginkona hans Sigríður Árnadóttir. ,,Þorbjörg stundaði nám við húsmæðraskólann á Laugalandi í Eyjafirði. Hún giftist Sigurði Snorrasyni, málarameistara, frá Stóru-Gröf ytri í Skagafirði. Þau eignuðust fimm börn saman, fyrir átti Þorbjörg einn son. Sigurður og Þorbjörg bjuggu í Stóru-Gröf ytri til 1992, en þá fluttu þau að Drekahlíð 6 á Sauðárkróki. Á meðan Þorbjörg átti heima í Stóru Gröf sinnti hún búskap á meðan hann var stundaður. Á sjöunda áratugnum rak Þorbjörg sumardvalarheimili fyrir börn og var með börn í heilsársdvöl. Þá vann hún í frystihúsi Fiskiðjunnar á Sauðárkróki, í sængurgerðinni Ylrúnu og sútunarverksmiðjunni Loðskinn um árabil."

Dóttir Trausta Friðrikssonar og Ásu Nýbjargar Ásgrímsdóttur. Flutti til Vesturheims með foreldrum sínum árið 1922. Húsfreyja í Winnipeg.

Þorbjörn Árnason fæddist á Sauðárkróki 25. júlí árið 1948. Foreldrar: Þorbjörg Þorbjörnsdóttir og Guðbjartur S. Kjartansson bifreiðastjóri. Kjörforeldrar Þorbjörns frá fyrsta ári voru Árni Þorbjörnsson fv. kennari og lögfræðingur á Sauðárkróki, og Sigrún Sigríður Pétursdóttir, húsfreyja og skrifstofumaður. ,,Þorbjörn varð stúdent frá Menntaskólanum á Akureyri árið 1968, lauk lögfræðiprófi frá Háskóla Íslands 1974 og hlaut lögmannsréttindi 1983. Hann starfaði hjá bæjarfógetanum á Sauðárkróki og sýslumanninum í Skagafjarðarsýslu frá árinu 1974 til 1985, þar af aðalfulltrúi síðustu fimm árin. Þorbjörn gerðist framkvæmdastjóri sútunarverksmiðjunnar Loðskinns á Sauðárkróki 1985 og gegndi því starfi til 1990. Hann rak eftir það eigin lögmannsstofu á Sauðárkróki í nokkur ár en frá 1998 var hann með slíkan rekstur í Reykjavík auk þess að reka fyrirtækið Markfell ásamt eiginkonu sinni. Þorbjörn var bæjarfulltrúi Sjálfstæðisflokksins í bæjarstjórn Sauðárkróks árin 1978-1990, þar af forseti bæjarstjórnar í tvö kjörtímabil. Á þeim tíma sat hann í fjölmörgum nefndum og ráðum fyrir sveitarfélagið og Sjálfstæðisflokkinn. Undanfarin ár gegndi Þorbjörn ýmsum trúnaðarstörfum fyrir Landssamtök hjartasjúklinga og sat í stjórn samtakanna frá árinu 1998 sem varaformaður. Átti hann m.a. sæti í stjórn og framkvæmdaráði SÍBS og var um skeið stjórnarformaður Múlalundar."
Þorbjörn var tvíkvæntur. Fyrri eiginkona hans er Þórdís Þormóðsdóttir meinatæknir, þau eignuðust þrjú börn. Seinni kona Þorbjörns er Birna Sigurðardóttir, hún átti einn son fyrir.

Foreldrar hans voru Björn Jónsson hreppstjóri á Veðramóti og Þorbjörg Stefánsdóttir. Hann lauk prófi frá Bændaskólanum á Hólum vorið 1908. Vorið 1913 réðst hann sem vinnumaður til Brynjólfs Bjarnasonar í Þverárdal í Laxárdal fremri. Þar kynntist hann konu sinni, Sigríði Árnadóttur frá Geitaskarði og þau giftust sumarið 1914. Árið eftir fluttu þau að Heiði í Gönguskörðum og bjuggu þar í 11 ár. Þá fluttu þau að Geitaskarði í Langadal og bjuggu þar til æviloka. Þorbjörn tók virkan þátt í félagsstörfum, þá sérstaklega því sem sneri að söng en hann var sjálfur góður söngmaður. Þorbjörn og Sigríður eignuðust sex börn.

Dóttir Alberts Þiðrikssonar frá Sviðningi og k.h. Elínar Petrínu Pétursdóttur. Fædd í Vesturheimi. Kona Eyjólfs Þorkelssonar Erickson frá Gili í Borgarsveit, sem um langt skeið var búsettur í Selkirk í Manitoba, en síðast í Calgary í Alberta.

Fædd og uppalin í Múlasýslu. Kvæntist Brynjólfi Sveinssyni frá Ásgeirsbrekku, menntaskólakennara á Akureyri. Þau eignuðust þrjár dætur.

Þórdís var frá Lágubúð á Bækarklettum, síðar búsett á Sauðárkróki og var m.a. í fimleikahóp Jóns Þ. Björnssonar. Flutti í Steingrímsfjörð og svo á Hólmavík. Kvæntist Steingrími Magnússyni, símstjóra á Hólmavík.

Foreldrar hennar voru hjónin Jónas Jónasson skáld (Hofdala-Jónas) á Syðri-Hofdölum og k.h. Anna Jónsdóttir frá Þorleifsstöðum. Kvæntist Páli Þorkelssyni frá Ingveldarstöðum á Reykjaströnd.

Þórdís Þorkelsdóttir fæddist 26. október 1895 á Unastöðum í Kolbeinsdal. Foreldrar hennar voru Þorkell Dagsson, bóndi síðast á Róðhóli í Sléttuhlíð og Sigríður Guðrún Þorláksdóttir.
Þórdís giftist 1922 Skarphéðni Sigfússyni, þau hófu fyrst búskap í Ásgeirsbrekku í Viðvíkursveit 1917 en fluttu þaðan að Mið-Hóli í Sléttuhlíð 1923, þar bjuggu þau í tvö ár. Á Ysta-Hóli bjuggu þau svo í átta ár en fluttu að Sjöundarstöðum í Fljótum 1933 þar sem þau bjuggu í tuttugu og eitt ár eða til 1954. Þá fluttu þau til dætra sinna í Borgarfirði þar sem Þórdís bjó til 100 ára aldurs, síðast búsett á Akranesi. Þórdís var á 106. aldursári þegar hún lést.
Þórdís og Skarphéðinn eignuðust tvær dætur.

Bifreiðastjóri, áður búsettur í Stóragerði í Óslandshlíð, nú á Sauðárkróki. Kvæntist Jörgínu Þóreyju Jóhannsdóttur, þau eignuðust fjögur börn.

Þórður Guðmundur Sveinbjörnsson, skrifstofustjóri, var fæddur á Húsavík 9. október 1871. Faðir: Lárus Edvard Sveinbjörnsson (1834-1910). Móðir: Jörgine Sigríður Margrethe Thorgrímsen (1849-1915). Eiginkona: Björg Lovísa Pálmadóttir (1885-1972). Guðmundur lést 8. apríl 1950.

Sonur Gunnars Ólafssonar og Guðnýjar Jónsdóttur sem bjuggu í Keldudal, á Lóni og í Ási í Hegranesi. Bústjóri á Lóni í Viðvíkursveit 1905-1914, bóndi á sama stað 1914-1938. Kvæntist Önnu Björnsdóttur frá Hofstöðum, þau eignuðust einn son.

Foreldrar: Jóhannes Friðrik Hansen (1925-) og Ingibjörg Jóhanna Þórðardóttir Hansen (1927-2011).
Maki: Edda Lúðvíksdóttir. Þórður er verktaki á Sauðárkróki.

Þórður Hjálmarsson, f. á Stafni í Deildardal 03.08.1879, d. 02.01.1978 á Sauðárkróki. Foreldrar: Hjálmar Þórðarson bóndi í Stafni og sambýliskona hans Ragnheiður Gunnarsdóttir. Þórður ólst upp hjá foreldrum sínum í Stafni við almenn sveitastörf. Eftir að faðir hans féll frá árið 1893 var hann fyrst í Stafni með móður sinni eitt eða tvö ár en fluttist síðan að Kambi til Þorgilsar föðurbróður síns. Var hann þar þar til hann giftist frænku sinni, Þórönnu, eftir áramótin 1903. Um veturinn voru þau hjónin enn á Kambi en hófu búskap á Háleggsstöðum um vorið og bjuggu þar eitt ár. Vorið 1916 fluttu þau aftur að Háleggsstöðum og bjuggu þar óslitið til 1952, er synir þeirra tóku við búinu. Voru þau áfram þar í húsmennsku. Þórður lifði konu sína í 15 ár. Hann dvladi hjá sonum sínum á Háleggsstöðum en þegar þeir brugðu búi og fluttust suður var Þórður um kyrrt hjá Þórönnu fósturdóttur sinni og Hafsteini manni hennar. Dvaldi hann þar fram undir það síðasta og gekk að ýmsum verkum kominn á tíræðisaldur.
Maki (gift 19.02.1903): Þóranna Kristín Þorgilsdóttir (02.05.1879-11.09.1963).

Sonur Maríu Kristínar Valgardsdóttur Claessen og Sigurðar Thoroddsen. Var í Reykjavík 1910. Skrifstofumaður á Fríkirkjuvegi 3, Reykjavík 1930. Bæjarfógeti á Akranesi, síðar í Reykjavík.

Bóndi í Réttarholti í Blönduhlíð, Skag. Var í Axlarhaga, Flugumýrarsókn, Skag. Var í Axlarhaga í Blönduhlíð 1801. Bóndi á Kvennabrekku í Miðdölum, Dal. 1803-05.
Eiginkona hans var Ragnhildur Tómasdóttir fædd 1753.

Kaupmaður á Ísafirði, síðar í Reykjavík. Kvæntist Dýrunni Jónsdóttur frá Ögmundarstöðum.

Þórður Kristjánsson, f. 12.11.1915, d. 14.07.1991.
Foreldrar: Sigríður Híramína Jóhannesdóttir (1879-1946) og Kristján Albert Kristjánsson útvegsbóndi og kaupmaður á Suðureyri.
Þórður ólst upp á Suðureyri hjá foreldrum sinum, fjórði í röð níu systkina. Hann tók kennarapróf frá kennaraskólanum 1946 og gerðist kennari á Helllissandi. Árið 1949 fór hann til framhaldsnáms í Kaupmannahafnarháskóla. Fór einnig til námsdvalar í Noregi. Eftir það gerðist hann kennari við Laugarnesskólann. 1960-1961 fór hann til námsdvalar í Bretlandi. Hann starfaði á fræðsluskrifstofu Reykjavíkur frá 1957 og var ma. námstjóri í kritnum fræðum.
Maki: Ásdísi Vilhelmsdóttir. Þau eignuðust eina dóttur.

Kaupfélagsstjóri í Borgarnesi, síðast búsettur í Reykjavík.

Héraðslæknir í Öxarfjarðarumdæmi um tíma eftir 1903 og sat á Skinnastað. Héraðslæknir í Borgarnesi.

Sonur Péturs Sighvats símstöðvarstjóra og Rósu Daníelsdóttur. Þórður hóf snemma að vinna við síma- og raflagnir með föður sínum ásamt sjómennsku og öðrum algengum störfum. Hann tók vélstjórapróf árið 1932 og annaðist vélar frystihúss Kaupfélags Skagfirðinga ásamt öðrum í mörg ár. Þórður var vélstjóri á síldarbátum sem hann gerði út ásamt Pálma bróður sínum og Sigurði P. Jónssyni frænda þeirra á árunum 1932-1937. Hann lauk iðnskólaprófi í rafvirkjun árið 1939, sá fyrsti á Sauðárkróki, og fékk meistaréttindi í því fagi 1943. Á árunum 1939-1949 var hann rafveitustjóri á Sauðárkróki. Símstjóri var hann frá 1938-1954. Hann var símaverkstjóri eftir það til 1979, er hann lét af störfum. Þórður annaðist nýlagnir og viðhald símalagna allt frá N- Ísafjarðarsýslu austur í Þingeyjarsýslur þótt starfsvettvangur hans væri fyrst og fremst í Skagafirði. Frá árinu 1940 rak Þórður eigið rafmagnsverkstæði sem síðar varð grunnurinn að félagin Al hf. er hann stofnaði með rafvirkjum sem hann hafði kennt. Nafni þess fyrirtækis var seinna breytt í Rafsjá hf. Þórður var lengið viðloðandi verslunarrekstur og var hluthafi í mörgum fyrirtækjum á Sauðárkróki og endurskoðandi reikninga Búnaðarbankans á Sauðárkróki í marga áratugi. Þórður var áhugasamur um félagsmál, félagi í Leikfélagi Sauðárkróks í marga áratugi, sá um lýsingu á sýningum félagsins og lék stöku hlutverk. Hann var félagi í Rótarýklúbbi, stangveiðifélagi og Iðnaðarmannafélagi Sauðárkróks og var heiðraður af Landssambandi iðnaðarmanna. Þórður kvæntist Maríu Njálsdóttur frá Hrafnseyri við Arnarfjörð, þau skildu, þau eignuðust tvö börn.

Foreldrar: Magnús Benedikt Benediktsson Blöndal, síðast hreppstjóri í Stykkishólmi og f.k.h. Ragnheiður Sigurðardóttir. Fjögurra ára gamall fór Þórður í fóstur að Kornsá í Vatnsdal til frænda síns, Lárusar Blöndal sýslumanns og Kristínar konu hans. Að Lárusi látnum fór hann í fóstur, þá 12 ára, til Björns prests á Hofi á Skagaströnd og k.h. Bergljótar. Fluttist Þórður með þeim árið 1901 að Hvammi í Laxárdal, er sr. Björn tók við prestakalli þar. Um tvítugt sigldi Þórður til Danmerkur og starfaði þar á búgarði um tveggja ára skeið. Við heimkomuna settist Þórður að á Sævarlandi og gerðist ábúandi þar árið 1914, er Elín hálfsystir hans fluttist til hans ásamt móður sinni. Bjuggu þau systkinin þar á hluta jarðarinnar á móti Jóhanni Sigurðssyni og k.h. Sigríði Magnúsdóttur til ársins 1921, er þau fluttust til Sauðárkróks og settust þar að. Á Sauðárkróki vann hann verslunar- og skrifstofustörf. Starfaði fyrst sem sýsluskrifari, en réðst þaðan til KS og vann fyrst við afgreiðslu og síðan bókhald. Hann sat einnig í hreppsnefnd Skefilsstaðahrepps og síðar í hreppsnefnd Sauðárkróks. Var í sóknarnefnd á Sauðárkróki um árabil og jafnframt gjaldkeri; gjaldkeri sjúkrasamlagsins og vann ötullega að uppbyggingu þess. Hann hafði á höndum bókhald fyrir fjölmarga einstaklinga og félagasamtök. Þórður kvæntist ekki en hélt heimili með Elínu hálfsystur sinni, þau tóku þrjú börn í fóstur.

Þórður Stefánsson fæddist á Hrafnhóli í Hjaltadal 26. ágúst 1926. Foreldrar hans voru hjónin Stefán Guðmundsson og Sigurlína Þórðardóttir. Þórður kvæntist Rósu Bergsdóttur 22. febrúar 1964. Þau eignuðust fjögur börn. Þau hófu búskap á Hofi í Hjaltadal en eftir nokkurra ára búskap þar keyptu þau jörðina Marbæli í Óslandshlíð þar sem þau bjuggu síðan.

Þórður Sveinbjörnsson (eftirnafn), skrifstofumaður í Reykjavík, var fæddur í Reykjavík 5. júní 1918. Faðir: Þórður Guðmundur Sveinbjörnsson (1871-1950). Móðir: Björg Lovísa Pálmadóttir (1885-1972).
Látinn 16. júní 1977.

Þórður fæddist í Vallatúni undir Eyjafjöllum. Safnvörður á Skógum. Eftir hann liggur fjöldi bóka um íslenskt þjóðlíf fyrri tíma.

Dóttir Árna Ásgrímssonar b. og hreppstjóra á Kálfsstöðum í Hjaltadal og k.h. Margrétar Þorfinnsdóttur. Þórey starfaði sem kennari, ógift og barnlaus.

Dóra fæddist í Hofsósi 1944. Foreldrar hennar voru Þorseinn Hjálmarsson póst-og símstöðvarstjóri í Hofsósi og Pála Pálsdóttir kennari þar. Dóra starfaði sem talsímavörður í mörg ár bæði í Hófsósi og á Sauðárkróki. Hún nam hýbýlafræði í Kaupmannahöfn. Dóra vann við skrifstofusörf við Fjölbrautarskólann á Sauðárkróki 1987-1988. Árin 1989 -1991 var hún gjaldkeri hjá Pósti og síma á Sauðárkróki. Árið 1991 tók hún við stöðu forstöðumanns Héaraðsbókasafns Skagfirðinga og starfaði þar til ársins 2007. Dóra vann um tíma á Upplýsingamiðstöð ferðamála í Varmahlíð.Hún tók þátt í starfi Alþýðuflokksins og síðar Samfylkingarinnar. Dóra var lengi félagi í Alþýðulist í Skagafirði.
Eiginmaður hennar var Sigurgeir Angantýsson bifvélavirki, þau eignuðust þau tvö börn, Halldóru Vöndu og Andra.

Dóttir Ólafs Guðmundssonar sjómanns og Sigurlaugar Gísladóttur. Þórey var einkabarn og ólst upp hjá foreldrum sínum, fyrst í Húnavatnssýslu og síðar á Sauðárkróki. Þar fékk hún góða skólamenntun. Þórey kvæntist Guðmundi Björnssyni frá Veðramóti, þau bjuggu fyrst á Sauðárkróki og síðan í Tungu í Gönguskörðum 1922-1931, en það ár fluttu þau aftur til Sauðárkróks. Þórey starfaði bæði með kvenfélagi Sauðárkróks og leikfélaginu. Eins var hún handavinnukennari við barnaskólann á Sauðárkróki á árunum 1936-1945. Þórey og Guðmundur eignuðust þrjú börn.

Þórey Sigmundsdóttir, f. í Gunnhildargerði í Hróarstungu 01.09.1886, d. 02.11.1963. Foreldrar: Sigmundur Jónsson og Guðrún Ingibjörg Sigfúsdóttir. Þórey ólst upp á heimili foreldra sinna í fjölmennum systkinahópi. Fljótlega eftir femringu tók hún að sér barnakennslu í sveit sinni. Veturinn 1907-1908 stundaði hún nám við mjólkurfræðiskóla Grönfeldts á Hvítaárvöllum. Sumarið eftir tók hún að ser stjórn rjómabúsins á Gljúfuráreyrum í Skagafirði. Þá um sumarið kynntist hún mannsefni sínu.
Maki: Kristján Hansen (1885-1943). Þau eignðust ekki börn saman kjördóttir þeirra var Gunnhildur, dóttir Ólínu Hansen, systur Kristjáns. Fyrir átti Kristján soninn Steingrím Kristján Friðrik, með Guðrúnu Friðriksdóttur (1877-1934).

Þórey Sigurðardóttir fæddist á Skúfsstöðum í Hjaltadal, Skagafirði, 12. mars 1924. Faðir: Sigurður Jónsson (1882-1965) bóndi á Skúfsstöðum. Móðir: Anna Sigurðardóttir (1885-1943), húsmóðir á Skúfsstöðum. ,,Þórey ólst upp á Skúfsstöðum í Hjaltadal. Nítján ára gömul, við lát móður sinnar, gekk hún í störf hennar og sinnti húsfreyjustörfum á Skúfsstöðum meðan faðir hennar lifði. Þórey var ráðskona við Barnaskóla Rípurhrepps frá 1965 þar sem Lilja Sigurðardóttir vinkona hennar var skólastjóri og styrktist þá ævilöng vinátta Þóreyjar við fjölskylduna. Með þeim Lilju og Sigurði Jónassyni og börnum flutti Þórey til Akureyrar og saman keyptu þau Möðruvallastræti 1 sem varð heimili Þóreyjar eftir það nema síðasta eina og hálfa árið sem hún bjó á Hlíð. Þórey var einn af stofnendum Kristniboðsfélagsins Frækornsins í Skagafirði. Á Akureyri gekk hún til liðs við Kristniboðsfélag kvenna, var þar gjaldkeri í rúm 20 ár, og KFUK þar sem hún var í stjórn í 25 ár og þar af formaður í 19 ár. Þórey vann alla tíð við þjónustustörf, á FSA, Sólborg og hjá Akureyrarbæ í heimaþjónustu. Sérstaka unun hafði Þórey af því að vinna í kristilegu starfi með börnum og unglingum. Þórey var matráðskona og umsjónarkona með stúlknastarfi í Sumarbúðum á Hólavatni í 30 ár, frá 1966-1996. Bar hún alla tíð hag Hólavatns fyrir brjósti og var það Þóreyju mikil gleði þegar hún var sæmd heiðursviðurkenningu KFUM og KFUK á Íslandi í febrúar á þessu ári."
Þórey var ógift og barnlaus.

Foreldrar: Sveinn Guðmundsson og Þorbjörg Ólafsdóttir í Bjarnastaðahlíð. Maki: Tómas Pálsson. Bjuggu lengst af á Bústöðum í Austurdal. Eignuðust 7 börn.

Dóttir Sævars Einarssonar og Guðlaugar Guðrúnar Gunnarsdóttur á Sauðárkróki.